ఇటీవల నన్ను అబ్బుర పరిచిన భారత దేశ ఆవిష్కరణలు

ప్రపంచానికి జైపూర్ ఫుట్ ని అందించింది మన దేశమే అయినా, ఇటీవల 'టైం' పత్రికలో ఇంకాస్త అభివృద్ది చేయబడిన జైపూర్ ఫుట్ గురించి చదివి దానికి '50 బెస్ట్ ఇన్వెన్షన్స్ లో' స్థానం దక్కడం చూసి నాకు చాలా ఆనందం కలిగింది. అప్పటి కుత్రిమ కాలుకి, ఇప్పటి కుత్రిమ కాలుకి తేడ ఏంటంటే, అప్పటి కుత్రిమ కాలు, కాలు మాత్రమే లేని వారికి ఉపయోగ పడేది. ఇప్పుడు అభివృద్ది చేసిన కాలు, తొడ భాగం, మోకాలు లేని వాళ్ళకి కూడా అమర్చవచ్చు(ఇక్కడ బొమ్మలో చుపిన విధంగా). కాలు లేని పిల్లవాడు ఏకంగా కోతి కొమ్మచ్చి ఆడటం నిజంగా ఆనందకరమైన విషయం కదా? పైగా ఇది $28 కే దొరుకుతుందట. నాకు కనీసం వంద అయినా కొని, కాలు లేని పిల్లలకి ఇవ్వాలని ఉంది అతి త్వరలో.

ఇవాళ నన్ను ఆనంద పరిచిన ఇంకో విషయం ఏమిటి అంటే, భారత మానవుడి జన్యు క్రమాన్ని, భారత శాస్త్రవేత్తలు పూర్తి చేయటం. కొంచెం ఆలస్యంగా అయినా, దాన్ని సాధించినందుకు చాలా ఆనందం కలిగింది. జన్యు క్రమాన్ని పూర్తి చేసి ఏమి చేయొచ్చు? నాకు తెలిసి, వ్యాధి కారక జన్యువులని ముందే గుర్తించి ఆ వ్యాధులు రాకుండ జాగ్రత పడొచ్చు. ఆమ్మో డబ్బు ఎక్కువేమో? అవును ఒక మనిషి జన్యు క్రమాన్ని పూర్తి చేయటనికి ఎన్నో సూపర్ కంప్యూటర్లు పని చేయాలట, కనీసం కోటిన్నర అయినా అవుతుందట. కాని ఇది మొదలు మాత్రమే. ఆ ఖర్చుని తప్పకుండా లక్షకి పట్టుకొచ్చే ప్రయత్నాలు 'హ్యూమన్ జీనోం ప్రాజెక్ట్' ముమ్మరంగానే చేస్తోంది.

ఇంకా చెప్పాలంటే నన్ను ఆనంద పరిచిన విషయం ఇంకొకటి కూడా వుంది, అదే కోపెన్ హాగెన్ సదస్సు కోసం భారత దేశం చాల కీలక మైన నిర్ణయాలే తీసుకుంది. అగ్ర రాజ్యాలు చేసిన చెత్తకి, తన వంతు బాధ్యతగా ఆ దేశాలన్నిటిని మించి ఎక్కువ శాతం కర్బన వ్యర్దాలని తగ్గించుకోటనికి ఒప్పుకుంది అంటే, నిజంగా పెద్ద హృదయం ఉన్నట్లే కదా. అంతటి సౌభ్రాతృత్వం భారతానికే చెల్లు. అందరం కలిసి ఈ పరిణామాలని హర్షిద్దాం.

అగ్ర రాజ్యాల ఆగడాలు, పేద రాజ్యల కష్టాల గురించి తప్పకుండా తదుపరి టపాలో ప్రస్తావించాలని ఉంది. బహుషా, సదస్సు తదనంతరం.
--విజయ